Akusatuak ez du argitu zergatik zeuden bere DNA arrastoak labanan

2014ko inauterietan Irunen ustez gizon bat hil zuen pertsonaren aurkako epaiketak bigarren eguna izan du gaur. Horretan, akusatuak ezin izan du argitu zergatik atzeman zuten bere DNA krimena egiteko erabilitako labanan.

Gaurko saioan, inputatuak (dominikar jatorriko gizon bat da) deklaratu du. Atzo, epaimahaia hautatu zuten, eta fiskalak eta defentsak euren lehen alegazioak aurkeztu zituzten. Akusatuaren aurka 17 urteko kartzela-zigorra eskatu du Fiskaltzak.

Istiluak 2014ko martxoaren 2an jazo ziren, Kolon etorbidearen parean dagoen gau-aisialdi gune batean. Bertan, pertsona batzuek liskar batean parte hartu zuten, eta, ustez, labankadaz hil zuten biktima, 24 urteko gizon kamerundar bat.

Gaurko deklarazioan, prozesatuak azaldu du hilketaren egunean, 04:00etan, taberna batean zegoela. Une horretan, pertsona batek abisatu zion bere lagun bat borroka batean zegoela. Hara iristerakoan, jatorri afrikarreko hiru gizon oldartu zitzaizkion eta kolpatu egin zuten. Biktimak bere burua defendatu zuen, eskuak baino ez erabilita. Izan ere, ez zeraman armarik.

Liskarraren ondoren, Frantziara joan zen, lan bila. Geroago, Poliziak lagun baten etxebizitzan atxilotu zuen.

Beste deklarazio batzuk

Gaurko saioan, zenbait poliziak ere deklaratu dute. Agenteek eta akusatuak gogorarazi dute biktima ihesi ikusi zutela, sabeletan mina zuela. Ertzain horiek, halaber, labana bat aurkitu zuten lurrean.

Bestalde, fiskalak biktimak praketan zeuzkan odol-orbanei buruz galdetu dio akusatuari. Prozesatuak esan du ez dakiela zein den horien “jatorria”.

Bihar jarraituko dute epaiketarekin, fiskalak eta defentsak proposatutako lekuko berriekin.