Gizartea -
Igandean, 12:00etan
Bardeako maniobra militarren aurka protesta egingo dute Tuteran
Azaroaren 6an beste elkarretaratze bat egingo dute Iruñean. Estatuko eta Europako 30 taldek eta elkartek mobilizazioak babestu dituzte.
eitb.eus
Bardeako tiro-eremuan egiten ari diren maniobra militarren aurkako mobilizazioak deitu dituzte. Horrela, datorren igandean protesta egingo dute Tuteran, eta azaroaren 6an beste elkarretaratze bat Iruñean, Radio Euskadik jakitera eman duenez. Nafarroako lauko Gobernuak tiro-eremua ixtea eskatu zuen atzo.
Estatuko eta Europako 30 talde eta elkarte maniobra militarren aurka agertu dira, eta protestei babesa eman diete. Tuterako elkarretaratzea 12:00etan hasiko da, Euskadi Irratiak jakinarazi duenez.
Bitartean, NATOko maniobren hirugarren eguna bete da gaur. Maniobrak azaroaren 6ra arte luzatuko dira. Inguruko bizilagunek maniobrak 'nolabaiteko normaltasunez' hartu dituzte; izan ere, ohituta daude dagoeneko, baina batzuek gelditzeko eskatu dute.
Soinu-langa hausten duten hegazkinen zaratak behin eta berriro errepikatu dira, baina Arguedaseko bizilagunak ez dituzte ezustean harrapatu. Herria tiro-eremutik 15 bat minutura dago soilik.
Nahiz eta hegazkinetara eta dardaretara ohituta egon, bizilagun askok tiro-eremua ixtea nahi dute.
