Abisu horia euriteengatik gaur arratsaldean Bizkaian eta Gipuzkoan

Eusko Jaurlaritzaren Segurtasun Sailak abisu horia ezarri du gaur arratsaldetik bihar eguerdia arte euriteengatik Bizkaian eta Gipuzkoan.

Abisua 18:00etan jarriko da indarrean, eta biharko 12:00ak arte iraungo du, eta bereziki gogorrak izango dira euriteak kostan eta ekialdean.

Euskalmetek iragarri duenez, giro nahasia ostiralerako. Zerua, tarteka oso hodeitsu egongo da eta noizean behin eta han-hemenka zaparradak botako ditu; zenbait lekutan trumoitsuak eta mardulagoak izan daitezke. Haizea noraezean ibiliko da, goizean hegoaldetik sartuko da eta arratsaldean iparraldetik. Tenperaturak behera egingo du eta epelenak, oro har, 20 ºC-tik behera geratuko dira.

Larunbatean eguraldiak hobera egingo du. Eguna motel antzean hasiko dugun arren, arratsaldean argituko du. Goizean zerua lainotuta egongo da eta oraindik tantaren bat bota lezake, baina eguerditik aurrera atertu eta argitzeko joera hartuko du. Haizeak hego-mendebaldetik joko du goizean eta ipar-mendebaldetik arratsaldean. Tenperatura maximoak ostiralekoak baino 2-4 ºC altuagoak izango dira.