Gizartea -
Tren istripua
40 lagun zauritu dira Frantzian, bi trenen arteko istripuan
Antza, abiadura handiko tren batek atzetik jo zuen eskualde mailako zerbitzua egiten ari zen beste tren bat Denguin herrian.
Erredakzioa
Dagoeneko, 40 dira Frantzian, Pauetik gertu, atzo izan zen tren istripuan zauritutakoak. Abiadura handiko tren batek eta eskualdeko ibilbidea egiten ari zen tren arrunt batek talka egin zuten. Tren azkarrean 178 lagun zihoazen, eta bestean, 70.
Frantziako hedabideek zabaldu dutenez, Pauetik 17 kilometrora izan zen ezbeharra, Pirinio Atlantikoetan, atzo arratsaldeko 17:38an. Antza, tren azkarra abiatu berria zen talka gertatu zenean, eta, beraz, abiadura ez zen horrenbestekoa. Kolpea, baina, gogorra izan omen zen.
Frederic Cuvillier Frantziako Garraio idazkariak jakitera eman duenez, istripua izan zen lekuan bidearen seinaleztapena egokia zen.
Pirinio Atlantikoetako prefekturak hondamendiak gertatzen direnerako prestatuta duten erreskate plana jarri zuen martxan, atzo bertan.