Gizartea -
Bilaketa
Polizia neskatoak bahitzen dituen gizon bat bilatzen ari da Madrilen
Polizia Nazionala beti berdin ekiten duen gizon bat bilatzen ari da: neskatoak bahitu eta, ondoren, hartzen dituen tokitik urrun uzten ditu.
Erredakzioa
Neskatoak bahitzen dituen gizon bat bilatzeko lanak areagotu ditu Polizia Nazionalak. Gaizkileak Madrilgo Ciudad Lineal barrutian bahitzen ditu adingabeak.
Iragan asteartean sei urteko neskato txinatar batek lau ordu eman zituen desagertuta. Desagertu zen lekutik zazpi kilometrora aurkitu zuten.
Poliziaren iturriek azaldu dutenez, ikerketa-lerro bat baino gehiago du zabalik Poliziak, baina, hipotesi nagusiaren arabera, apirilaren 10ean barruti horretan adingabe bat bahitu zuen gizon bera da bahiketa horien egilea. Parke batean lagunekin jolasten ari zen adingabe bat bahitu zuen orduan.
Polizia Nazionala beti berdin ekiten duen gizon bat bilatzen ari da: neskatoak bahitzen ditu, lasaigarri bat ematen die (oraindik ez dakite zein), bainatu egiten ditu (zantzu biologikoak ezabatzeko) eta, ondoren, bahitzen dituen tokitik urrun uzten ditu.
Poliziaren arabera, ikerketa lan horren lehen emaitzak laster jasotzea espero dute.