Stop Accidentesek autobideetako abiadura zatika igotzea baztertu du

Stop Accidentes elkarteak Trafikoko lege-proiektutik autobideetako abiaduraren zatikako igoera kentzea eskatu du gaur, Bideko Indarkeriaren Biktimen Nazioarteko Egunez Donostian izan den ekitaldian. Gainera, gidatzerakoan izan daitezkeen "portaera arduragabeez" kontzientziatzeko deia egin dute.

Azalpen horiek asoziazioko bozeramaileak, Marta Mansok, Donostiako Alderdi-Ederreko lorategietan irakurri duen manifestuan biltzen dira.

Ekitaldian izan dira, besteak beste, Garbiñe Saez Eusko Jaurlaritzako Trafikoko zuzendaria, Larraitz Ugarte Mugikortasunerako eta Bide Azpiegituretarako Gipuzkoako diputatua eta Andoni Agirregomezkorta aktorea. Guztiek minutu bateko isilunea egin dute trafiko istripuetan hil direnen omenez.

Kode Penalaren erreforma aurreproiektua kritikatu du Stop Accidentesek. Mansoren hitzetan, "arduragabekeria arinek eragindako lesioak" ezabatzea aztertzen du, baita "tasa judizialen igoera" ere. "Horrek biktimak babesik gabe eta heriotzak eragiten dituztenak zigorrik gabe utziko ditu".

"Biktimentzat prebentziozko justizia konpontzailea eta errudunentzat berrezketa" eskatu ditu Mansok, eta uztailean Santiagon Alvia trena errailetik irtetean hil zirenak gogoan izan ditu.

Trafiko istripuak "hain gertakari bortitzak eta ustekabekoak" direnez, "lege-aurreproiektuan biktima guztientzat eskubide berdinak izatea" eskatzen du asoziazioak.

Stop Accidenteseko bozeramaileak gogorarazi du munduko errepideetan 3.500 pertsona baino gehiago hiltzen direla egunero. Hori dela eta, gizartea "delituzko portaerek eta arduragabekeriek dituzten ondorio larriak" kontuan izatera bultzatu nahi du.

"Guztiok gara zaurgarriak", azpimarratu du Mansok, eta 2012an 376 oinezko hil zirela esan du.

Garbiñe Saez Eusko Jaurlaritzako Trafikoko zuzendariak zehaztu du gaur dela eguna "errepideetan gertuko norbait galdu dutenen ahotsa" entzuteko, eta gidarien, oinezkoen eta txirrindularien arteko "errespetua" eskatu du.

Ospakizunerako kamioi bat eta bi karpa utzi ditu Eusko Jaurlaritzako Trafiko zuzendaritzak. Sail horrek prebentzioari eta kontzientziazioari garrantzi handia ematen diola aipatu du Saezek, eta eskoletan etorkizuneko gidariekin egiten den lana azpimarratu du.

Gipuzkoako diputatuak, Larraitz Ugartek, aldundiak errepideak seguruago egiteko eskumenak dituela adierazi du, eta instituzioen arteko elkarlanari garrantzia eman dio istripuak ekidin ahal izateko.