Kamioi gidari bat hil da Urnietan, A-15ean izan den istripuan

Hil egin da Urnietan istripua izan duen kamioi gidaria, Eusko Jaurlaritzako Segurtasun Sailak baieztatu duenez. 61 urteko gidari portugaldarra da hildakoa.

Ezbeharra 12:10ean izan da, A-15 errepidean. Kamioia errepidetik irten eta irauli egin da, eta, ondorioz, gidaria ibilgailu barruan harrapatuta geratu da.

Suhiltzaileek atera dute, larri zaurituta, baina bertan hil da geroago, zauri horien ondorioz.

Istripua dela-eta, Donostiarako bi bideak eta Iruñerako beste bide bat itxi behar izan dituzte, eta auto ilarak sortu dira.

20:15ean, kamioia errepidetik kentzeko lanak amaitu dituzte garabiek, eta eskubiko erreiak zabaldu dituzte, Iruñeko noranzkoan eta Donostiako noranzkoan.