Gizartea -
Entzierroaren kronika
Zezen jatorrak eta korrikaldi garbiak
Lasterketak 2 minutu eta 27 segundoko iraupena izan du. Igandean baino jende gutxiago izan da, eta horrek arriskua murriztu du eta korrikaldi politak egotea ahalbidetu du.
Erredakzioa
Dolores Aguirre Sevillako ganadutegiko zezenek entzierro azkarra eta garbia egin dute. Lehen datuen arabera, ez da inor adarkadaz zauritu.
Lasterketak 2 minutu eta 27 segundoko iraupena izan du. Igandean baino jende gutxiago izan da, eta horrek arriskua murriztu du eta korrikaldi politak egotea ahalbidetu du.
Entzierroa 08:00etan puntuan hasi da, zezenak Santo Domingoko ukuilutik atera direnean.
Udaletxeko plazara eta Mercaderes kaleko sarrerara ziztu bizian iritsi dira zezenak, horietako bi erori egin direlarik, baina berehala altxatu dira eta bidean aurrera jarraitu dute.
Estafeta kalean hainbat korrikalari erori dira, baina asteburuan baino jendetza gutxiago izan da eta toki gehiago izan dute babesa bilatzeko.
Zezen plazara apurka-apurka iritsi dira, eta erdigunean une batez egon ostean, ukuiluan sartu dira.
Entzierroko bitxikeria Santo Domingo kalean gertatu da: zezen batek buelta eman du eta kontrako noranzkoan joan da. Ezinegona eta urduritasuna piztu da, baina artzainek zezena bideratzea lortu dute eta egoera normaltasunera bueltatu da.
