Gazte bat arma zuriz hil dute Algortan

20 urteko gazte bat hil da goizalde honetan Algortan (Getxo, Bizkaia), arma zuri batek eragindako zauriengatik, dirudienez, artazi batzuekin. Liskar batean parte hartu ostean gizona zauritu da.

06:30ak igarota eta gazte bat arma zuriz zauritu dela jakitean, Getxoko Udaltzaingoa Bizkerre kalean bertaratu da. Biktima oso larri zegoen, eta hainbat medikuk osatutako talde batek gaztea artatu du, baina ezin izan du gaztea berpiztu.

Halaber, Getxoko Udaltzaingoak gizon bat atxilotu du, heriotza horrekin lotura duelakoan. Gainera, polizia-agentek jazotakoaren inguruan hainbat lekukok eskainitako informazioa bildu dute.

Iturri berdinek jakinarazi dutenez, hildakoa Getxon bizi zen, eta bi gazteak perutarrak ziren.

Ertzaintzak ikerketa abiatu du jazoeraren nondik norakoak argitzeko. Hasierako ikerketak dioenez, handik hurbilera aurkitutako artaziekin zauritu dute gaztea. Jazoeraren lekuan epaitegiko batzordea dago, gorpua bertatik eramateko.