Emakume bat hil dute labankadaz Antsoainen

43 urteko emakume bat labankadaz hil dute gaur gauean Nafarroan, Antsoainen, eta bi lagun atxilo hartu dituzte hilketarekin zerikusia dutelakoan, Udaltzaingoak jakinarazi duenez.

Atxilotuek 55 eta 30 urte dituzte. Poliziak ez du argitu indarkeria matxistarekin lotutako hilketa bat izan den eta auzia guardiako epaitegiaren esku utzi dute.

Hermanos Noain kaleko etxebizitza batean bi gizonezkoren artean eztabaida larri bat izaten ari zirela esanez dei bat jaso dute agenteek gauerdian, eta, gertakariaren tokira bertaratu direnerako, emakumearen hilotza aurkitu dute.

Biktimarekin bizi ziren gizonezko bi hartu ditu atxilo Poliziak eta Polizia-etxera eraman ditu. Guardia Zibila arduratuko da auzia ikertzeaz.