Eusko Jaurlaritzak sei hilabeteren buruan turismo-tasari buruzko proposamena aurkezteko konpromisoa hartu du

Eusko Jaurlaritzako Turismo, Merkataritza eta Kontsumoko sailburu Javier Hurtadok konpromisoa hartu du sei hilabeteko epean Ogasun Sailarekin eta gainerako erakundeekin adostutako proposamen bat aurkezteko, Euskal Autonomia Erkidegoan turismo-tasa aplikatzeko. Gainera, Turismo Lege berri bat egingo dela eta Baliabide Turistikoen Lurraldearen Arloko Plana onartuko dela iragarri du.

"Egonaldi turistikoei zerga bat ezartzeko baldintzak betetzen dira", defendatu du sailburuak Legebiltzarreko batzordean, eta bere Sailak hurrengo lau urteetarako izango dituen jarduera nagusiak azaldu ditu.

"Bidezkoa da Euskadiz gozatzera datorrenak ere Euskadi hobetzen laguntzea", adierazi du Hurtadok, eta azaldu du tasak ez duela bilatzen "turisten sarrera atzeratzea", baizik eta Euskadi hobetzea, eta bildutako dirua "udalerrietan eta herritarren bizi-kalitatean eragina duten turismo-politiketara" bideratzea.

Era berean, sailburuak iragarri du Turismo Lege bat egingo dela, "turismo-jasangarritasunari buruzko kontzientziazioa" eta gisako kontzeptuak kontuan hartuta, turismo inklusibo eta irisgarriaren bidea urratzeko eta Turismoaren Kode Etikoa azarriko duena.

Legegintzaldi honetan, gainera, Baliabide Turistikoen Lurralde Plan Sektoriala onartuko da, "epe luzerako turismo jasangarriaren eredua finkatuko duen ekosistema turistikoa" sortzea helburu duena. Plan hori erabilera turistikoko etxebizitzen "kontrolerako beste tresna bat" ere izan daiteke, adierazi du.

Pisu turistikoei dagokienez, Hurtadok esan du Euskadin erabilera turistikoko etxebizitzak guztizkoaren % 0,4 direla, " % 1,33ko batez besteko Estatukoaren oso azpitik", baina Eusko Jaurlaritzak saihestu egin nahi du bizitegi-etxebizitzen eraikinak eraikin turistiko bihurtzea, "etxebizitza eskubidea delako".