EAEko enpresaburuen % 34 bakarrik dira emakumeak

Euskal Autonomia Erkidegoko (EAE) enpresaburuen % 34,4 baino ez ziren emakumeak iaz, parekidetasunetik urruti oraindik ere. Eustat Euskal Estatistika Erakundeak gaur zabaldu dituen datuen arabera, proportzioak azken bi urteetan behera egin arren, 2015etik gora egin du, % 33,7koa baitzen orduan.

2018an enpresaburu guztien % 35,4 ziren emakumeak, eta 2019an, ostera, % 35,1.

Hala ere, joera ez da bera izan lurralde guztietan. Izan ere, sei puntu egin du behera Araban, ia hiru puntu igo da Bizkaian, eta ia berdin mantendu da Gipuzkoan.

Araban, beherakada nabarmena izan da 2015etik 2020ra: % 36,7tik % 30,8ra. Bizkaian, joera bestelakoa da: 2015ean % 33koa zen eta iaz, berriz, % 35,8koa. Azkenik, Gipuzkoan proportzioa ia berdina da: enpresaburuen % 33,2 ziren emakumeak 2015ean, eta % 33,4, berriz, 2020an.

2030 Agendaren helburuak lortzeko bidean kontuan hartzen den adierazleetako bat da aipaturikoa.