Ertzaintzak jaiegunetan zabaltzen dituzten dendak babestuko ditu

Sindikatuek azkenean bertan behera utzi dute prestatutako beste protesta bat, Bilbon, hilaren 18rako, dendak jaiegunetan zabaltzearen aurka, UGT sindikatuak jakinarazi duenez.

Elkarretaratzea joan den urtarrilaren 8an zabaldu zuten dendaren aurrean egingo zuten baina azkenean bertan behera utzi dute. Egun horretan ere elkarretaratzea egin zuten eta tentsioa izan zen: Ertzaintzak erosle batzuei lagundu behar izan zien, manifestarien irainen aurrean.

Herrizaingo Sailak segurtasun neurriak ezarriko ditu dendarien askatasuna bermatzeko, Sailak berak jakinarazi duenez.

Herrizaingo Sailaren arabera, urtarrilaren 8ko protestan ez ziren Poliziak ezarritako baldintzak bete, eta, ondorioz, txosten bat zabaldu dute Hiritarren Segurtasunari buruzko Legea hautsi zelako.

Baliteke arau hauste horrek zigor ekonomikoak ekartzea antolatzaileentzat.