Nork ordainduko du opor fiskalen isuna?

EAEko opor fiskalei buruz ostegun honetan erabakiko du Luxenburgoko Auzitegiak. Dirua itzultzeari buruz erabaki behar du, baina baita 40 milioi euroko isunari buruz ere. Bi egun lehenago polemika piztu da, isuna nork ordaindu behar duen argi ez dagoelako: Estatuak edo EAEko diputazioek. Legea anbiguoa da eta isuna ordaindu beharrik ez dutela uste dute Eusko Jaurlaritzak eta Arabako Foru Aldundiak.

Orain dela gutxi onartutako Ekonomia Jasangarriaren Legeak euskal erakundeek isuna ordaindu behar dutenik zehazten ez duela dio Eusko Jaurlaritzak. EBk Espainiari ezarri zion isuna, "opor fiskalen" bidez emandako laguntza ez berreskuratzeagatik. PSEren Exekutiboak eztabaida zabalik dagoela uste du eta zerbitzu juridikoei txosten bat egiteko eskatu die.

Jaurlaritzaren esanetan, gauzak ez daude batere argi. Zigor eta isunak ordaintzeko erantzukizuna zehazteko gaitasuna du Ministroen Kontseiluak, arauaren arabera, baina ezarritakoa "Kontzertu Ekonomikoaren Legeari kalterik egin gabe" aplikatu behar dela dio ere. Kontzertu Ekonomikoaren Legeak ez ditu isunak "bere gain hartzen".

Aguirre

Europar Batasuneko araudia urratzen duten erakundeek Bruselak ezarritako isunak ordaindu beharko dituztela dio Ekonomia Jasangarriaren Legeak. Erabaki honen aurrean, Carlos Aguirre Eusko Jaurlaritzako Ekonomia eta Ogasun sailburuak Gobernuaren jarrera jakinarazi du.

Bruselaren aurrean, Luxenburgoren aurrean eta Madrilen "Euskadiren interesak" defendatu egingo dituztela berretsi du Aguirrek. Ekonomia Jasangarriaren Legeak opor fiskalen auzian isunak zeinek ordaindu beharko dituen argi uzten ez duela gaineratu du (Kontzertu Ekonomikoari errespetua erakusten dio lege honek).