N-1eko bidesaria baliogabe uzteko ebazpena 'harrigarria' dela esan du Olanok

Kamioilariei N-1 errepidean jarritako bidesaria baliogabe uzteko erabakia "gogorra" eta "harrigarria" dela esan du Markel Olano Gipuzkoako Foru Aldundiko ahaldun nagusiak.

EAEko Auzitegi Nagusiak atzo kaleratutako ebazpena izan du hizpide buruzagi jeltzaleak, goizean, Radio Euskadin egin dioten elkarrizketan. CNTC Espainiako Merkataritza Garraioen Konfederazioak jarri zuen salaketa bidesariaren kontra, eta epaileak arrazoia eman dio. Zehazki, ebazpenak dio Europako Batzordearen araudia urratu duela Gipuzkoako Aldundiak, atzerriko garraiolariak baztertuz.

Olanok esan duenez,  "zorrotz" landu zuten Europako araudia, eta "bereziki" atzerriko garraio astunei dagokien atala. Horregatik, "harrigarria" iritzi dio ahaldun nagusiak  araudi europarra urratzen dela esatea epaiak.

Auzitegi Gorenera joko dutela adierazi du Olanok, eta kautelazko neurririk ez dagoen bitartean, bidesaria kobratzen jarraituko dutela ziurtatu du.

Egoera "bere onera ekartzeko lanean" ari direla gaineratu du, gaia "politiko eta juridikoki" nola bideratu lantzen.

Betalde, ahaldun nagusiak jakitera eman du asteon zabaldu behar zituztela N-1eko bidesariaren bidez orain arte bildutakoari buruzko datuak, baina ez dute hala egingo, "ez delako une egokia".