Bilboko Portuan 296 lanpostu sortuko dira itsas-dorre eolikoei esker

Haizea Wind enpresak itsas-dorre eolikoak eta beste osagai batzuk fabrikatzeko instalazio bat eraikiko du 2018. urtean Bilboko Portuan. Lantegi hori martxan jartzeko, 55 milioi euroko inbertsioa egin behar da, eta 296 lanpostu sortuko ditu.

Asier Atutxa Bilboko Portuko Agintaritzako presidentearen arabera, “proiektu estrategikoa” da. Ildo horretatik, Bilboko Portuak 19 milioi euroko ekarpena egingo duela jakinarazi du. Inbertitutako dirua tasen bidez jasoko dute bueltan, horren esanetan.

Halaber, fabrika berri horren instalazioa eraikitzeko, Ekarpen Inbertsio Sozietateak hamabi milioi euro inbertituko ditu, eta ekimenaren bultzatzaileek jarriko dute gainerakoa.

Bilboko Portuak ohar baten bidez azaldu duenez, tamaina handiko 540 dorre-zati fabrikatzeko ahalmena izango du instalazio berriak. Gainera, itsasoko parke eolikoetan erabiltzen diren beste pieza handi batzuk ekoitziko dituzte instalazio horretan.