'Arrakasta' eskola garraioko asteleheneko greban, sindikatuen arabera

EAEko irakaskuntza-zentro publikoetako eskola garraioko eta jolastokietako monitoreek astelehenerako deituta zuten greba eguna "arrakasta" izan da sindikatuen arabera. ELAk esan duenez (LABekin, UGTrekin eta CCOOrekin batera du deituta protesta), deialdiak izan duen erantzuna joan den astekoa (astelehenean eta asteartean ere egin zuten) baino handiagoa izan da: % 5 igo da Gipuzkoan eta Araban. Helburua ez da aldatu: hitzarmen kolektiboa eskatzea.

Bere datuen arabera, eragina % 90-95ekoa izan da goizean Bizkaian (joan den astekoa bezalakoa) eta % 65ekoa Gipuzkoan eta % 55ekoa Araban; hortaz, aurreko asteko datuekin alderatuta, % 5 igo da erantzuna azken bi lurralde horietan.

Sektorean dauden ia 500 langileak asteartearako eta asteazkenerako ere badaude deituta, eta urtarrilaren 27tik aurrera mugagabekoa izan zitekeela ohartarazi dute. Azken egunetan, sindikatuek ez dute harremanik izan enpresekin, eta, ondorioz, protestarekin jarraitzen dute.

Astelehen goizean zehar, kolektiboak Karrantzan (Bizkaia) eta Gasteizen, Eusko Jaurlaritzaren aurrean, egin ditu mobilizazioak, bere aldarrikapenen alde.

Sindikatuak azken erreforma laboralaren aurrean "blindatutako" hitzarmena sinatzea eskatzen ari dira, horren ordez egongo den beste akordio bat itxi arte mugagabeko ultraaktibitatea duena. Halaber, igoera bat ari dira eskatzen soldatan, sektore publikoan parekoa den lan-kategoriara ahalik eta gehien gerturatzeko.