Candyko zuzendaritzak eta langileek aurreakordioa lortu dute

Candy Hoover konpainiako zuzendaritzak eta enpresa batzordeak aurreakordioa adostu dute, bost hilabeteko enplegu-erregulazio txosten bat onartzeko, betiere birrindustrializazio prozesua sustatzeko helburuz.

Enpresa batzordeak jakinarazi duenez, Bergarako (Gipuzkoa) lantegiko langileek oniritzia eman diote aurreakordioari. Bozketan, 122 pertsonak egin dute alde; zazpik, aurka, eta bik boto zuria eman dute.

Aurreakordioa behin betiko egin ahal izateko, Candyk eta Gipuzkoako Foru Aldundiak beste akordio bat lortu beharko dute, konpainiaren instalazioak eta lursailak transferitzeko.

Langileen ordezkarien esanetan, aurreakordioa "ona" da, bide judizialari ekitea saihesten duelako. Nolanahi ere, multinazional italiarrak deslokalizazio asmoei eutsi egin diela salatu du.

Horren ildotik, lan erreformaren ondorioz, hainbat enpresak "aldebakarrez eta inolako kontrol publikorik gabe" ixtea erabaki dutela deitoratu du Candyko enpresa batzordeak. Gainera, Eusko Jaurlaritza gogor kritikatu du, "konprimisorik" hartu ez duelako.

Azkenik, goratu egin ditu langileen "borroka" eta Bergarako herritarrek erakutsitako "elkartasuna". "Inplikazio horri esker lortu da aurreakordioa, neurri handi batean", adierazi du.