Telemadridek 861 langile bidegabe kaleratu dituela esan du Justiziak

Madrileko Justizia Auzitegi Nagusiko lan-arloko gelak Telemadridek 861 langile bidegabe kaleratu dituela ebatzi du, lan-erregulazioko txostena "indarrean dauden legeei egokitzen" ez dela argudiatuz. Hala ere, horrek ez du langileak berriro kontratatzera behartzen, sindikatuek esan dutenez.

Halaber, kalte-ordain gehiago eman beharko dizkie langileei enpresak; zehazki, urteko 45 egun.

Epaileak dagoeneko bi aldeei jakinarazi die UGT sindikatuak urtarrilean jarri zuen salaketa kolektiboaren gaineko epaia. UGTren iritzian, lan-erregulazioko txostena neurrigabea zen, eta, "arrazoi politikoak" direla eta, horren ondorioz, erakunde publikoa "desegitea" ekarriko zuen.

Epaian, erakundeak galerak izan dituela probatutzat jo du epaileak, baina "egoera ekonomiko negatibo bat ez da nahikoa 1.161 langileko enpresa batek 925 lagun kaleratzea justifikatzeko"

Epaia ezagutu bezain laster, Teresa Garcia enpresa batzordeko presidenteak "garaipen partziala" dela esan du, kaleratzeak bertan behera uztea gustatuko litzaiekeelako.

Orain, Auzitegi Gorenean kasazio helegitea aurkeztu ala ez aztertuko dutela gaineratu du.