Starbucks salatu du bezero batek, edarietan izotz gehiegi jartzeagatik

Starbucks kafetegi-katearen kontrako salaketa jarri du Chicagoko (AEB) bezero batek, edari hotzetan "izotz gehiegi" jartzeagatik. Publizitate engainagarria egitea leporatu dio salaketa jarri duen emakumeak enpresari, iragartzen duen likido kopurua ez duela zerbitzatzen argudiatuta. Bost milioi dolarreko kalte-ordaina eskatu du salatzaileak.

CNN telebista-kateak epaitegian aurkeztutako salaketaren testua zabaldu du. Bertan jasotzen denez, Starbucksek bere iragarkietan edalontzien tamainaren (bertan kabitzen den likido kopurua) berri ematen du, baina izotza ez da kontuan hartzen.

"Edari hotzen menuan, edalontzien tamaina iragartzen du Starbucksek, baina bertan ez da zehazten edalontzi horietan zerbitzatuko den likido kopurua. Hortaz, bezeroa engainatzen du enpresak", esan du salatzaileak, epaitegira eraman duen testuan.

Starbucken kafetegietan gehien erabiltzen den edalontziaren tamaina 709 mililitroko edukieraduna da, baina salaketaren arabera, izotza botatakoan likido kopurua 414 mililitrotara murrizten da.

"Gure bezeroek jakin badakite izotza gure edarien osagai ezinbestekoa dela, betiere, izozdun edaria eskatzen badute. Bezeroren bat zerbitzatutako edariaren prestaketarekin gustura geratzen ez bada, beste bat prestatuko diogu, atsegin handiz", esan dio CNN kateari Jamie Riley Starbuckseko bozeramaileak.