Gu
Ikus-entzunezkoak
Gaizka Izagirreren epaia: ‘Anatomy of a Fall’ eta ‘Poker Face’ dira 2023ko film eta telesailik onenak
'GU'ko kolaboratzaileak 2023an ikusi dituen telesail eta filmen arteko bi onenak aukeratu ditu.
-
‘Anatomy of a Fall’ filmeko fotograma
11:47 min
Urtea amaitzearekin batera, enkargua eskatu diogu Gaizka Izagirre kolaboratzaileari: urteko film eta telesail onenak aukeratzeko. Asko kostatu zaion arren, ekarri dizkigu bi izen.
Gaizka Izagirrerentzat, 2023ko pelikularik onena Anatomy of a Fall (Anatomía de una caída) da. Zinemaldian ikusi zuen kolaboratzaileak eta aho bete hortz utzi zuen.
Film frantsesa da, Justine Triet zinemagileak zuzendutakoa. Thriller itxurako gertakari batean oinarrituta, bikote harreman baten deskribapena egiten du zintak, epaiketa luze baten bitartez. Une honetan zinema areto komertzialetan dago ikusgai.
Telesailaren aukeraketa gehiago kostatu zaio gure kolaboratzaileari. 2023ko telesail berri onena Poker Face da. SkyShowtime plataforma digitalean ikus daiteke Natasha Lyonne aktorea protagonista duen telesaila. Charlie Cale kasinoko langilea gorpuzten du aktoreak.
Atal bakoitzeko krimen bat argituko du protagonistak, gezurretan ari den jendea harrapatzeko duen gaitasun paregabeari esker. Telesaila ikusteko erraza eta erakargarria dela azaldu digu kolaboratzaileak. Gainera, atalak laburrak dira eta solte ikus daiteke.
