Enpresetan 28 lapurreta egozten dizkioten talde kriminal bat desegin dute Gipuzkoan

Ertzaintzaren Gipuzkoako Lurralde Ikerketa Kriminaleko Zerbitzuko, Nafarroako Polizia Nazionaleko Polizia Judizialeko Brigada Probintzialeko eta Delitu Ekonomikoen Brigadako agenteek eta Nafarroako Foru Poliziaren Ondarearen aurkako Brigadako agenteek Terrorismoaren eta Krimen Antolatuaren aurkako Inteligentzia Zentroak koordinatuta egin duten ikerketa bati esker, Gipuzkoako ustezko talde kriminal bat desegin dute, lurralde horretako enpresetan eta mugakideetan indarra erabiliz lapurretak egiten omen zituena.

Aipatutako taldea osatzen zuten hamar gizonetatik zazpi, 22 eta 60 urte bitartekoak, maiatzaren 27an eta 28an atxilotu zituzten Iruran, Andoainen, Donostian eta Iruñean egindako operazioan, hainbat fasetan eta modu koordinatuan.

Taldeko beste bi kide ikertu bezala daude polizia-atestatuan, eta hamargarren kidea ez dute atxilotu, Martuteneko espetxean beste arrazoi batengatik zigortuta zegoelako. Gizon hori kartzelatik irteteko baimenez baliatu zen, orain atxilotuta dauden gainerako taldekideekin batera lapurretetan parte hartzeko.

Era berean, hamar miaketa egin ziren, eta hainbat gauza atzeman zituzten; lapurretetan erabiltzeko tresna ugari, dokumentazioa, telefono mugikorrak, dirua, arma simulatuak eta hainbat lapurretatan erabilitako ibilgailu bat, besteak beste.

Talde horretako kide batzuk, bi buruak, 2014an egindako antzeko beste operazio batean atxilotu zituzten. Orduko hartan, biak espetxeratu zituzten.

2019ko bigarren seihilekoan indarra erabiliz enpresetan egindako lapurretak areagotu ondoren, urte horren amaieran ekin zitzaion dagokion ikerketari. Hurrengo sei hilabeteetan bildutako datuen eta ondorengo analisiaren ondorioz, eta talde kriminaleko kideei buruz egindako zaintza- eta jarraipen-lanekin batera, ikertzaileek informazio nahikoa lortu zuten talde horri enpresa eta gasolina-zerbitzuguneetan indarrez egindako 28 lapurreta egozteko; horietatik 20 Gipuzkoan, 6 Nafarroan, 1 Araban eta azkena Bizkaian.

Azkenik, 2020ko maiatzaren 27an, lehen atxiloketak egin zituzten, eta atxiloketa horiek jarraipena izan zuten biharamunean, hilaren 28an.

Atxilotuak epailearen esku utzi ondoren, maiatzaren 29ko goizean, instrukzio-epaileak ikertuetako bat espetxeratzeko eta gainerakoak karguekin aske uzteko agindu zuen, eta epailearen aurrean agertu beharko dute hala eskatzen zaienean.

Ikertzaileek atzemandako ebidentzia guztiak aztertzen jarraitzen dute; izan ere, ez dute baztertzen ebidentzia horiek aztertuta talde kriminal aktibo horrek egindako beste delitu batzuei buruzko datu garrantzitsuak lortzea.